Александр Эшкинин фотолары.

Быел Мәскәүдә яңа ел чыршысы 25 декабрьдә Зур Кремль сараенда узачак. Анда республикабыздан 105 бала катнаша. Алар арасында Чаллы укучылары да бар: Дарья Ребрихина (2 нче балалар музыка мәктәбе укучысы), Елизавета Куркина (7 нче балалар музыка мәктәбе укучысы) һәм Савелий Симонов (4 нче балалар музыка мәктәбе укучысы).

Бу бәйрәмгә төрле дәрәҗәдәге олимпиада җиңүчеләре, фәнни һәм иҗтимагый оешма вәкилләре чакырыла. Болар - сигез-унөч яшьлек балалар.

Шулай ук бәйрәмгә батырлык күрсәткән балалар да чакырулы. Мәсәлән, тугыз яшьлек малайны суга батудан коткарган 13 яшьлек Илфат Әюпов - шуларның берсе.

«Мин күпердә балык тотып утыра идем, теге малай велосипедында күпер аркылы чыкканда елгага егылып төште.

Мин моны күрдем дә суга сикердем һәм аны тартып чыгардым. Үзем бер дә курыкмадым. Соңыннан әти-әнием мине мактады, мәктәптә медаль дә бирделәр әле», - дип искә төшерә Илфат.

Елизавета Куркинаны исә җырлаудагы уңышлары өчен чакырганнар – ул инде моның белән җиде ел шөгыльләнә.

«Йолдызлык» фестивалендә җырлыйм, конкурсларда катнашам, шуның өчен мине Мәскәүгә җибәрделәр. Анда үземә бик күп яңа дуслар табармын дип уйлыйм», - диде ул.

«Ел  саен бөтен Россиядән иң актив, иң тырыш яшьләрне Кремльгә Президент чыршысына чакыралар», – дип сөйләде Татарстан Яшьләр эшләре министры урынбасары Анна Захматова.

Мәскәүгә киткәнче балаларның документларын җентекләп тикшерделәр, аларга ТАССР символикасы төшерелгән бүрекләр һәм шарфлар тапшырдылар. Шулай ук, балаларның сәламәтлеген табиблар җентекләп тикшергәннәр һәм алар барысы да сау-сәламәт дигән фикергә килгәннәр.

Балалар Россия башкаласында ике көн булачак. Алар шәһәр буйлап экскурсиядә һәм башка күптөрле чараларда катнашачак.

Материал Татар информ сайтыннан.