Ильвина Шәйдуллина: «Иң кадерле нәрсә – вакыт»

Ильвина Шәйдуллина Актаныш районы Аккүз мәктәбендә укучылар үзидарәсе җитәкчесе, алдынгы укучы, кыскасы, лидер. Лидер булу кыен микән ул? Без – 5 нче сыйныф  укучылары Илина һәм Назлыгөл Ильвина ападан шул хакта сорадык.  

– Лидер булыр өчен кешедә нинди  сыйфатлар булырга тиеш, Ильвина апа?

– Беренче чиратта,  ихтыяр көчедер. Үз -үзеңә ышану, кушылган эшне җиренә җиткереп эшләү һәм, әлбәттә, максат куя белү.

– Ә син «Мин лидер булам!» дип максат куйдыңмы?

– Юк, иң зур максатым – мәктәпне яхшы билгеләргә генә тәмамлап, югары уку йортына керү минем. Кечкенәрәк максатлар да бар. Аларга даими ирешеп киләм.

– Нинди профессия сайлаячаксың инде?

– Табиб.

– Табиб булыр өчен нинди  фәннәрне  яратып укырга кирәк икән?

– Ярату кирәктән тормый бит ул, кызлар. Мин үзем алгебра, инглиз теле, химия, җәмгыять белеме, физкультура яратам.

– Ә хоббиең бармы, Ильвина апа?

– Телефонда төрле фотолардан видеолар ясыйм яки булмаса коллаж эшлим. Кешеләргә туган көннәренә җырлы видеокотлаулар ясап җибәрәм.

– Димәк, син музыкага да битараф түгел? Ә җырчылардан кумирың кем?

– Ришат Тухватуллин. Аның «Мәтәүтамак», «Синнән башка» дигән җырлары бик ошый.

– Хәзер китап уку модада түгел бит, әйеме?

– Нишләп модада булмасын инде – яңа гына бер китап укып бетердем: «Ак  маңгайлы бүреләр» дигән. Авторы – Фаил Шәфигуллин. Кышкы каникулларда сез дә тик ятмагыз, укыгыз!

– Ә Яңа елга «Көмеш кыңгырау» газетасы укучыларына һәм безгә дә нинди теләкләрең бар?

– Киләсе ел кызыклы очрашуларга, сөенечле мизгелләргә бай булсын! Үзегез дә вакытны әрәм-шәрәм итмәскә өйрәнегез!  

Яңа елның яңа кары безгә

Яңа бәхет нуры өстәсен!

Өстәлләргә – муллык, күңелләргә –

Ихлас теләкләрнең көлтәсен...

Назлыгөл Шәйдуллина, Илина Вәлеева, Актаныш районы, Аккүз мәктәбе, 5нче сыйныф.