Яз көне ниләр эшләргә була?

Яз – яңару һәм яшәрү вакыты. Ел фасылы алышыну белән актив ял итү, төрле маҗаралар һәм экскурсияләр өчен дә яңа мөмкинлекләр ачыла. Әгәр дә син табигатьнең матурлыгыннан ләззәт алырга, яңа тәҗрибәләрне сынап карарга телисең икән, сиңа берничә ысул тәкъдим итәбез.

Табигатьне “эләктереп” кал

Язын бар дөнья кышкы йокыдан уяна, бөреләр ачыла, беренче чәчәкләр күренә башлый... Менә шул вакытны камера ярдәмендә истәлеккә калдырырга мөмкин. Юлыңда очраган һәрнәрсәне төшереп ал. Күрерсең, синең бик матур фотографияләр килеп чыгачак!

Бүлмәңне чүп-чардан арындыр

Яз – өйне җыештыру һәм кыш дәвамында җыелган тәртипсезлектән арыну өчен менә дигән вакыт. Шул рәвешле син үзең дә кирәкмәс әйберләрдән котылырсың.

Яңа хобби уйлап тап

Озын көннәр һәм җылы һава торышы җитү белән, ниндидер яңалыкка  омтылу барлыкка килә.  Яз – аларны чынга ашыру өчен менә дигән вакыт. Рәсем ясау, бакча серләренә төшенү, яңа спорт төрен өйрәнүне күздә тотарга мөмкин. Кыскасы, күңелеңә хуш килгәнне сайла.  

Кошларны күзәт

Яз – җылы яктан кайткан күчмә кошларны күрү өчен менә дигән вакыт. Бинокль ярдәмендә аларның очыш вакытын, ояларын, ни белән тукланганнарын күзәтергә була. Моның өчен якындагы паркка яисә урманга барырга кирәк. 

Велосипедта җилдер

Көннәр җылытуга, велосипедны алып, урамга чыгасы, анда рәхәтләнеп чабасы килә башлый. Тик, иң элек, саклык чараларын онытмаска кирәк! Шлем, тез һәм терсәкләрне саклагычларсыз велосипедка утырма! Тагын әле юл йөрү кагыйдәләрен дә төгәл үтәргә кирәк!