Җиңүче (Айгиз Баймөхәммәтов)

Җиңүче

Беркөнне апамның улы медаль алып кайтты! Мәктәптә йөзү буенча ярышта икенче урынны алган икән. Күрсәгезче, әнисенең никадәр шат­ланганын!

— Әнә, минем улым җиңүче булган! — дип кер­гәненә дә, чыкканына да сөйли ул, горурланып. — Кемнең малае иң җитезе — Айгөл апаңныкы.

Мактау сүзләрен ишеткәч, туганымның кәефе тагын күтәрелеп китте. Бездә ихлас шатландык, малайның аркасыннан шапылдатып сөеп тә ал­дык. Улының мондый уңышына әнисе юмартла­нып китте. Шул ук көнне кибеткә барып, малайга спорт киеме сатып алдылар.

Берничә көн үткәч, туганымның ничек җиңүе турында үзем сораштым.

— Мәктәптәге ярышта өч кеше ярышырга бул­ды, — дип башлады ул сүзен. — Тик ярыш алдын­нан гына берсе таеп егылып, аягын имгәтте. Йөз­гәндә теге малай финишка миннән күпкә алдарак килеп җитте. Аңа — беренче, ә миңа икенче урын­ны бирделәр.

Сорау

Студентлар белән очрашу бара. Мине сәхнәгә чакырып өстәл артына утырттылар. Тәүдә уйлаганнарымны сөйләп бирдем. Гадәттә, китап язу тарихы, аңа бәйле хәл-вакыйгалар белән уртак­лашасың.

—  Ә хәзер сорауларыгызны бирә аласыз? — дидем студентларга.

Иң арткы рәттә утырган егет кулын күтәрде.

—  Абый, суыгызны эчсәң буламы?

Барсы да пырх итеп көләргә тотынды. Тамагы кипкәндер, күрәсең. Егетне гаепләп булмый, со­рау бирде бит.

Вконтакте, Одноклассники, Телеграм - «Көмеш кыңгырау»ның яңалыклары әлеге социаль челтәрләрдә.