1нче май – Яз һәм хезмәт бәйрәме

Элегрәк аны Халыкара хезмәт ияләре бердәмлеге көне дип атап йөрткәннәр.

Тарихы болайрак. 1886 елның 1нче маенда Американың Чикаго шәһәрендә эшчеләр 8 сәгатьлек эш көне таләп итеп баш күтәрә. Әлеге баш күтәрү полиция хезмәткәрләре белән канлы бәрелешкә китерә.

1889 елның июлендә әлеге вакыйганы искә алып, ел саен 1нче майда демонстрациягә чыгу идеясе туа.

Халыкара хезмәт ияләре бердәмлеге көне беренче тапкыр 1890 елда Австро-Венгриядә, Бельгиядә, Германиядә, Даниядә, Испаниядә, Италиядә, АКШта, Норвегиядә, Франциядә, Швециядә һәм кайбер башка илләрдә билгеләп үтелә.

Озак вакытлар 1нче май бәйрәме революция, сыйныфара көрәшләр символы булып тора.

1992 елдан ул Яз һәм хезмәт бәйрәме дип атала башлый. Бу көнне төрле күңел ачу чаралары оештырыла, күп кеше аны гаилә белән табигатьтә каршы ала. 

Әлеге бәйрәм 140 илдә билгеләп үтелә.