Авыл маҗаралары

Айдарның каникуллары күңелсез башланып китте. Әти-әнисе аны, әбиеңә иптәш булырсың, ярдәм дә итешерсең дип, авылга кайтарып куйдылар. Ә анда эш харап, бернинди кызык юк, бала-чага да аз кайта, интернет та тотмый. Шул ишегалды уртасында ике-өч тавыгы белән әтәч кукраеп йөри дә, койрыгын болгап, аяк арасында Акбай бутала. Ничек итеп көннәрне үткәрерсең... Айдар моңсуланып калды, эче пошып тәрәзә янына барып утырды.

Күңелсез генә утырганда тәрәзә янына бер кошчык килеп кунды. Ул томшыгы белән тәрәзәгә шакый башлады. Айдар теләр-теләмәс кенә кошчыкка күтәрелеп карады.
– Нәрсә, чыгарга кушасыңмы, чыкмыйм, анда күңелсез. Кызу,  әллә нинди черкиләр, чебеннәр, кортлар оча.

Шулвакыт чыпчык, Айдарны үртәгәндәй тагын да ныграк итеп, тәрәзәгә шакыды. Малай түзмәде, сикереп торды да, урамга чыгып китте. 

Ишектән чыгу белән ул җирдән шуышып баручы бик матур күбәләк кортын күрде. Айдарга бу корт кызык булып тоелды, ул иелеп аны күзәтә башлады. «Моның өе кая икән, әти-әнисе кайда яши микән?» – дип, кортның артыннан әкрен генә үрмәләп китте. Корт чәчәк түтәленә килеп җитте дә, үлән яфрагына менеп утырды һәм тәмләп яфрак кимерә башлады. Үлән арасыннан сикереп чыккан бакадан куркып Айдар күтенә утыра язды. Баканы күзәтүе кызык тоелды Айдарга. Ишегалдында кукраеп, хуҗа булып йөргән әтәч белән «көрәшеп» алырга туры килде. Аннан соң Акбай белән су буеннан үрдәкләрне йөртеп алып кайттылар. Бераздан көтүдән сарыклар, аннан кәҗә кайтты. Әбисе белән сөйләшә-сөйләшә көтү каршылады Айдар. Иң кызыгы: бакчада яшелчәләргә су сибү булды. Шлангадан Айдар башта яшелчә, җиләкләрне коендырды, ә аннан соң, рәхәтләнеп үзе су сиптереп уйнады. Лыч суга батып бетте ул. Шулай итеп беренче көн маҗаралар белән үтеп тә китте. Җылы кәҗә сөте белән күмәч ашагач, Айдар урынга килеп ятты. Күзен дә йомарга өлгермәде, изрәп йокыга китте. 

Ринас Хәсәнов, Мөслим гимназиясе укучысы.