Түбән Камада «Туган як» профильле сменасы ачылды

23нче июнь көнне «Заря» балалар сәламәтләндерү лагеренда «Туган як» профиль сменасы ачылды. Биредә 150 бала 18 көн дәвамында саф һавада бергәләшеп ял итәчәк, татар телен, тарихын өйрәнәчәк.

Смена программасында төрле дәресләр, мастер-класслар, уеннар һәм күңел ачу каралган, ләкин аларның барысын да бер максат – татар халкының традицион кыйммәтләренә нигезләнеп, әхлакый тәрбия бирү берләштерә.

Быел программа Идел буе Болгар дәүләтендә ислам динен кабул итүгә 1100 ел тулуга багышланган. Барлык тәрбиячеләр дә татар телен яхшы белә, планлаштырылган чаралар татар мәдәниятенең матурлыгын, тарихның тирәнлеген күрсәтә һәм әйләнә-тирә дөньяны гармониядә һәм иҗади итеп кабул итүгә юнәлдерелгән.

Сменаны ачу тантанасы 24нче июнь көнне үтте. Ачылышта татар шагыйрьләренең шигырьләре, Пәйгамбәребезнең хәдисләре һәм изге Коръән аятьләре яңгырады.

Чыганак https://dumrt.ru/ru/narodnye-novosti/narodnye-novosti_27720.html