Татарстанда «Бала – төп пассажир!» профилактик чарасы үтә

Бүген республика юлларында автомобильдә балалар куркынычсызлыгын арттыру буенча масштаблы профилактик кампания үтә.

Ел башы статистикасыннан күренгәнчә, балигъ булмаган пассажирлар катнашында 78 юл-транспорт һәлакәте теркәлгән, аларда өч бала һәлак булган, 86 төрле дәрәҗәдәге җәрәхәтләр алган, дип хәбәр иттеләр республика Дәүләт автоинспекциясендә.

Күптән түгел Казанда булган вакыйга балаларны йөртү кагыйдәләрен үтәүнең мөһимлеген ачык күрсәтә. 16 августта «Renault» һәм «Лада» автомобильләренең тизлекне арттыру һәм каршы як полосага чыгу аркасында юл-транспорт һәлакәте була. Һәлакәт аркасында бер кеше һәлак булган, дүртесе зыян күргән, шул исәптән бер яшьлек бала да, ул әнисенең кулында булган.

Дәүләт автоинспекциясе 7 яшькә кадәрге балаларны автомобильнең теләсә кайсы утыргычында, шулай ук 12 яшькә кадәрге балаларны алгы утыргычта йөрткәндә махсус балалар иминлеге кәнәфиен куллану кирәклеге турында искә төшерә. 12 яшьтән өлкәнрәк балалар өчен куркынычсызлык каешын куллану мәҗбүри.

Бу кагыйдәләрне бозган очракта 3000 сум күләмендә штраф каралган. Шунысын да билгеләп үтәргә кирәк, балалар автокреслосыннан дөрес файдалану юл-транспорт һәлакәтләрендә үлем куркынычын сабыйлар өчен 70 процентка һәм кече яшьтәге балалар өчен 54-80 процентка киметә.

Чыганак: https://tatar-inform.tatar

Фото Фрипик сайтыннан.