Рәсемнәре мультик сыман

Рәсемнәрне Сафина Кузнецова ясап җибәргән. Сезне дә бу яшь рәссамчы белән таныштырырга булдык әле.

– Сәлам, Сафина, син кайсы мәктәптә укыйсың?

– Мин «Адымнар-Әлмәт» күптелле гимназиясенең 7нче сыйныфында укыйм. Гимназиябез әле яңа гына ачылса да, мин инде дуслар да табып өлгердем. Сыйныфыбыз дус, бергә матур бәйрәмнәр үткәрәбез, бер-беребезгә гел ярдәм итеп торабыз. Әлеге язманы укучы сыйныфташларыма, укытучыма зур сәламнәр җиткерәм.

– Рәсемнәрең бик матур. Син кайда шөгыльләнәсең?

– Рәхмәт. Мин рәсем мәктәбендә укыйм, шунда төрле стильдә рәсемнәр ясарга өйрәнәм. Әле икенче генә елымны укыйм, тик бу шөгыль күңелемә бик якын.

– Беренче рәсемеңне хәтерлисеңме? Нәрсә ясаган идең?

– Юк хәтерләмим шул. Тик әнием әйтүенчә, мин кечкенәдән үк рәсем ясарга яратканмын.

– Күбрәк нәрсә ясарга яратасың?

– Пейзаж, чөнки мин табигатьне бик яратам. Барлык ел фасыллары да үзенә күрә матур һәм төрле.

– Син ясаган стиль ничек дип атала?

– Барлык стильләрне дә яратам. Рәсемнәрем арасында күп төрлеләре очрый. Ләкин минем стилемне «мультяшный» дип әйтер идем.

– Рәсемнән кала тагын нәрсә белән кызыксынасың?

– Мин волейбол уйнарга яратам, шулай ук кул эшләре белән шөгыльләнәм. Кул эшләре миңа ниндидер рәхәт тынычлык бирә.

– Киләчәктә кем булырга телисең?

– Архитектор буласым килә. Архитектор булыр өчен дә рәсем ясый белү кирәк.

– Иң зур хыялың нинди?

– Санкт-Петербургта яшәү! Эх, шул хыялым тормышка ашсын иде!

– Бар теләкләрең чынга ашсын, Сафина, уңышлар сиңа!

Ай Кызы.