Казан укучылары тимер юлчы һөнәрен үзләштерә алачак

Казанда «Балалар тимер юлы»нда тәрбияләнүчеләр беренче мәртәбә тимер юл эшчеләренең төп һөнәрләре буенча белем алу мөмкинлегенә ия булачак. Уку азагында аларга һөнәри квалификация турында дәүләт таныклыгы биреләчәк. Бу хакта Горький тимер юлының Казан төбәге матбугат хезмәте хәбәр итә.

«Магистраль хезмәткәрләре балалар өчен мәктәптәге укудан аерылмыйча гына һөнәри белем алырга мөмкинлек бирә торган җайлаштырылган махсус белем бирү курслары эшләгәннәр», – диелә хәбәрдә.

Укулар 2024 елның IV кварталында башлана. Яшь тимер юлчылар ел дәвамында юл монтеры һәм пассажир вагонын озатучы, ә ике ел дәвамында тепловоз машинисты ярдәмчесе һәм станция буенча дежурный белгечлекләрен үзләштерә алачак.

Һөнәри әзерлек узу турында диплом алгач, алар Горький тимер юлына эшкә урнаша алачаклар.

Чыганак https://mon.tatarstan.ru