Чаллының 21нче мәктәбендә төбәкара нәфис сүз бәйгесе җиңүчеләрен бүләкләделәр

1нче ноябрь көнне ТР Язучылар берлеге рәисе урынбасары, Чаллы бүлеге җитәкчесе Факил Сафин Чаллы шәһәренең 21нче мәктәбендә укучыларның төбәкара нәфис сүз бәйгесендә жюри рәисе буларак катнашты һәм чыгыш ясады, җиңүче балаларны бүләкләде.

Чаллы шәһәренең 21нче урта гомуми белем бирү мәктәбендә “Мәктәп-белем учагы” дигән II региональ нәфис сүз бәйгесе үткәрелде. Бәйгенең беренче сайлап алу этабында җиңгән укучылар икенче этабында мәктәпнең актлар залында чыгыш ясадылар.

Бәйгедә 1-11 сыйныф укучылары мәктәп темасына багышланган шигырьләрне сәнгатьле сөйләүдә ярыштылар. Жюри составында танылган язучы Факил Сафин да бар иде. Ул балаларга, укытучыларга сөйләмне яхшырту өстендә эшләү буенча файдалы киңәшләр бирде.