Безнең әтиләр

Классыбызда әтиләргә багышлап иншалар яздык. Иң ошаган җөмләләрне сезгә дә укытасыбыз килде.

***

   Әтием Тәлгать заводта оператор булып эшли. Куллары алтын аның. Быел гараж салдык. Без Саша белән аңа булыштык. Әтиемне бик яратам.

Борханов Алексей

***

Әтием Дилфас исемле булганга аңа гел «Дипай» дип кенә эндәшәләр иде, ә миңа «бәләкәй Дипай» дип. Әтием бик оста гармунчы, бик яхшы мал врачы булган. Атлар ярата иде. Үскәч мин дә Сабантуйда ат ярышында катнашачакмын. Әлегә «Герда» белән әзерләнәбез.

Искәндәр Нурлыев.

***

    Минем әтием Айрат исемле. Ул дөньядагы иң көчле һәм иң әйбәт әти. Украинада хезмәт итүче абыем янына барып, аңа тәмле күчтәнәчләр илтеп кайтуы да гаиләбез өчен горурлык.

Әдилә Арсланова.

***

     Үскәч, мин әтием кебек, бик яхшы кеше булачакмын. Вильсун әтием кешеләргә яхшылык эшли, тырышып хезмәт куя. Мин аны бик яратам.

Самат Галиев.

***

Әтием Илфак инде 20 елдан артык авыл хуҗалыгында эшли. Ул бик әйбәт кеше. Авылда аны барысы да ярата. Мин әтием белән мәчеткә йөрим. Ул минем өчен үрнәк.

Гаянов Айтуган