Балалар – чын артистлар

Узган атнада Чаллының 26нчы «Ләйсән» балалар бакчасында шәһәркүләм мәктәпкәчә театр коллективларының онлайн-фестивале узды. 

Анда 27 балалар бакчасы катнашты. Алар берсеннән-берсе кызыклы татарча спектакль-әкиятләр әзерләп, жюри хозурына видеоматериаллар тәкъдим итте. 

Балалар Г. Тукай, А. Алиш, Р. Вәлиева, Р. Миңнуллин һәм башка авторлар әсәрләрен, шулай ук татар, рус, башкорт халык әкиятләрен сәхнәләштергәннәр. 5-6 яшьлек артистларның туган телебездә, зур осталык белән кызыклы һәм катлаулы образларны да ача алуы сокландырды һәм шатландырды.

Жюри әгъзалары – җырчы, «Манзара» музыкаль премиясе лауреаты Сәрия Нәбиуллина, Татарстан Республикасының атказанган артисты, А. Гыйләҗев исемендәге Чаллы татар дәүләт драма театры артисткасы Алсу Хәбетдинова, «Көмеш кыңгырау» газетасы журналисты Лариса Яруллина – балаларның саф татарча сөйләшүләренә, артистлык сәләтенә, декорация-костюмнарның оригинальлегенә һәм тәрбиячеләрнең оештыру-режиссерлык осталыгына бәя бирделәр.

Нәтиҗәдә, ун коллектив 1нче, 2нче, 3нче урыннарны бүлеште. Калганнар төрле үзенчәлекле номинацияләрдә җиңү яулады.

• 1нче урынны 1нче, 4нче, 61нче балалар бакчасы яулады.
• 2нче урынга 21нче, 36нчы, 49нчы, 82нче балалар бакчасы лаек булды.
• 3нче урында – 71нче, 113нче, 119нчы балалар бакчалары. 

Афәрин, бик сәләтле безнең балалар һәм бик булдыклы безнең тәрбиячеләр! Туган телебезне үстерүдә ныклы бер адым бу матур чара. Дәвамлы булсын.