Баянда уйнаганда йоклап киткән идем

Айсылу:

– Сәлам, дуслар! Яңа уку елында нинди түгәрәкләргә язылырга уйлыйсыз?

Резеда:

– Әллә бу хакта уйлыйсыгыз да килмиме әле?

Әдилә:

– Минем театр һәм бию түгәрәгенә языласым килә.

Ләйлә:

– Бу уку елында түгәрәкләрдән баш тартырмын инде. Бию түгәрәгенә узган елларда да йөргән идем, шунысы гына калыр. 9нчы сыйныф, күбрәк имтиханнарга игътибар  бирергә кирәк дип уйлыйм.

Әнвәр:

– 9нчы сыйныф ярый әле ул, түгәрәкләргә дә йөреп була, күптөрле чараларда да катнашырга өлгерәсең, экзаменнарга әзерләнергә дә вакыт күп кала. Ә менә 11нче сыйныф бераз куркытып тора әле мине. «Барысы да әйбәт булыр» дигән теләктә башлап карыйбыз инде уку елын...

Әмир:

– Миңа ошаган түгәрәкләр  булса, йөрер идем. Әйтик шигырь, хикәя, драма язу түгәрәге, көй язу, баянда яки синтезаторда уйнау түгәрәге. Безнең мәктәптә спорт түгәрәкләре эшли: волейбол, баскетбол, көрәш. Театр түгәрәге дә бар әле.

Түгәрәккә йөрү күп вакыт һәм көч сорый. Мин баян түгәрәгендә баян уйнап утырганда берничә тапкыр йоклап киткәнне хәтерлим.