Сезнең дә җәй тиз үтәме ул?

Ялларны онытылмаслык, файдалы итеп уздырырга кирәк. Бәлки шул очракта көннәрне бераз булса да «әкренәйтеп» булыр?! Җәйнең һәрбер көне истә калсын өчен нишләргә соң?

Эштә

Каникулда эшкә урнашырга була. Бу кесәлек акча, яңа танышлар, кызыклы тәҗрибә, файдалы вакыт уздыру дигән сүз.  Эшкә урнашмасаң, бер көнеңне әти-әниеңнең эшендә уздырып кара әле. Бәлки апа-абыеңныкында, кайсысының эше күңелеңә хуш килә бит. Әлбәттә, рөхсәт ителсә инде. Бер көнең башка мохиттә узар.

Аттракционнар

Кемнәр генә яратмый икән ул аттракционнарны. Гаилә белән паркта йөрү, туңдырма ашау. Һәрьяклап көлү тавышлары. Бу юлы башка елларда утырмаган берәр аттракционда әйләнеп кара әле.

Тәмле тамак

Бу көн сиңа һичшиксез ошаячак. Бу тәм-томнар көне. Үзең дә пешереп, ясап  карый аласың. Мәсәлән, җиләк-җимештән туңдырма, баллы әтәчләр, татлы пирог, осталыгың җитсә шоколадлы торт. Хәзер интернет челтәрләрендә нинди генә рецептлар юк бит. «Көмеш кыңгырау»да басылган «Тиз рецептлар»ны да куллана аласың.

Таңны каршы алу

Җәйнең бер матур көнен таңнан ук каршы алып кара. Бу  каникулның иң озын көне булачак. Алсу таңны күргәнең бармы? Үз йортың белән яшәсәң, иртәнге чыкта да ялан аяк йөреп кер.

Ай Кызы.