Узган тормыш белән яшәмәгез

Бу гадәт итальяннарга бө­ек Леонардо да Винчидан кереп калган, дигән сүзләр бар. Ул ярты ел буе кирәге чыкмаган әйберне - кием-салыммы ул яки башка әйберме - чыгарып ташлый торган булган. Бөек итальян фикеренчә, иске кием яки тузган җиһаз белән яшәү кешенең рухын гарип­ли, төшенкелеккә, явызлыкка этәрә. Бүгенге көн пси­хологлары аның бу фикерен бөек рәссамның башка эшләре кебек үк даһи дип исәплиләр. Кытай кызы Мари Кондо хәтта өй җыештыру сәнагте турында китап та язган.

Әлбәттә, без итальяннар түгел. Яңа ел алдыннан бераз чистарыну ту­рында гына сөйләшәбез.

Чистарыну дигәч тә, «генераль уборка»ны күз ал­дына китермәгез. Гадәттә, зурдан кубып өй җыештырганда без иске-москыны кузгатып, тузаннарын сөртеп, кире шул элекке урынына урнаштырып куябыз.

Шулай итеп, шкаф һәм киштәләргә ревизия ясый башладыгыз, ди. Баштан ук фикерегез катгый булсын: 15 ел элек үк алынган җәйге пәлтәгез, «өр-яңа килеш» булуга карамастан, чыгарып ташланырга тиеш. Әлеге катгый фикердән кире кайтмас өчен фәнгә, ягъни пси­хологлар сүзенә колак салыгыз: әгәр дә ел буе теге яки бу әйбергә орынып та карамагансыз икән, хәтта аны исегезгә дә алмагансыз икән, ул әйбер сезгә ки­рәк түгел.

Кул бармый, әйеме? Кирәге чыгар төслеме? Бирелмәгез бу хисләргә, әлеге дә баягы Плюшкинны исегезгә төшерегез. Сакчыл кеше еллар үтү белән кемгә әйләнә? Әлбәттә, ул әйбернең кайчан булса да кирәге чыгуы бар, әмма «кайчан да булса»ны гомер буе көтәргәмени?! Кешегә гомер иске-москыны череп беткәнче кияр өчен би­релмәгән бит.                                    

Фатирыгызның ерак һәм якын «почмакларына» тагын бер кат ревизия ясагыз — әллә ничаклы мәңге кирәк булмас әйберләр тартып чыгарачаксыз. Менә, мәсә­лән, колагы сынган чынаяк, сез моны, әлбәттә, шәп җи­лем алып кайтып ябыштырам, дигән ният белән арткарак тыгып куйгансыз. Ул, «шәп җилем»не көтеп, ким дигәндә, өч ел ятадыр инде. Менә иске кышкы итекләр, болары инде күне шәп, берәр нәрсәгә ярар, дип 10 ел буе сакланган. Чынаякны чүп чиләгенә ташласа­гыз, ә «яхшы күн»нәрне чыннан да берәр нәрсә эшли белә торган кешегә бирсәгез, дөресрәк булмыймы? Ә кемдер, мәсәлән, балалар әйберләре өчен сезгә рәхмәтле булыр. Иске журналларны, шкаф-комодлардагы әйберләрне көн яктысына чыгарып, аларга «читтән» күз салыгыз да, кирәкмәгәннәрен бернинди жәлләүсез ташлагыз. Иске әйберләргә ябышып яту­чылар - узган тормыш белән яшәүчеләр, киләчәккә юлны ябу өстенә, бүгенге көннәренә дә хәвеф чакырып торучылар.

Үткәннәр белән җиңел хушлашырга өйрәнегез. Яңалык һәм сафлык искелек урын бушатса гына керә ала.

Конмари методы буенча өй җыештыру

Син кайсы йолдызлык астында тудың?