Хыяллар тормышка ашсын!

Чыгарылыш сыйныфлары өчен бик җаваплы чор бу: дәүләт имтиханнары тапшыру, һөнәр, уку йорты сайлау вакыты. Чаллы шәһәренең 18нче мәктәбе 11А сыйныфы укучысы Ләйсән Гыймранова белән дә без бүген менә һөнәр турында сөйләшәбез.

– Мин архитектор булырга телим, – ди Ләйсән.

Ни өчен нәкъ менә архитектор дигән сорауга да җавабы әзер – чөнки ул төгәл сәнгать. Быел 11не генә түгел, Чаллыдагы 2нче санлы сәнгать мәктәбен дә тәмамлый Ләйсән. Инде уку йортын да (Казан Дәүләт Архитектура-төзелеш университетын) сайлаган һәм каникулларында әлеге уку йорты оештырган курсларда укыган.

Үз юлыңны табу җиңел түгел. Хыяллана белү генә җитми мәктәп тәмамлаучыларга, кыюлык та кирәк, Ләйсәндәге кебек тырышлык, түземлек, максатчанлык та. «Көмеш кыңгырау» сезгә – барыгызга да уңышлар тели, кадерле дуслар!