Көмеш кыңгырау

Республика балалар һәм яшүсмерләр газетасы

18+
2024 - Гаилә елы
Әкият

Ике алдакчы

Португал халык әкияте.

Яшәгән, ди, абыйлы-энеле ике ярлы егет. Эшләп-эшләп тә мантый алмагач, кеше алдап гомер итәргә булганнар болар.

— Әйдә, авылдан-авылга йөрибез. Мин халыкка ялган сүз сөйлим, ә син арттан җөпләп барырсың, — дигән абыйсы эне­сенә.

Җыенып, юлга чыккан болар. Абый кеше урамга килеп керүгә үк: «Күрше авылда могҗиза булды! Беләсегез килсә, акча бирегез, сөйлим!» — дип кычкыра башлаган. Моны ише­теп, халык җыелган.

— Күрше авылда җиде куллы бала туды! — дип, серле тавыш белән дәвам иткән алдакчы.

Беркатлы кешеләр моңа акча биргәннәр, ә кайберләре ышанмыйча карап тора икән. Шулчак урам башыннан алдак­чының энесе күренгән. Авыл кешеләре, берсеннән берсе узды­рып, моннан теге могҗиза турында сорашырга тотынганнар.

— Юк, җиде куллы бала күрмәдем мин... Әмма берәүләр­нең ишегалдындагы бауда җиде җиңле бәби күлмәге эленеп тора иде... Шул булса гына инде... — дигән яшь алдакчы.

— Димәк, дөрес инде,— дип шаулашкан халык, Һәм кеше­ләр берәм-берәм алдакчының кесәсенә акча сала башла­ганнар.

Ул арада моның абыйсы күрше авылга җитеп, андагы ха­лыкка кемнеңдер нарат башында тегермән коруы хакында сөйләп тора икән инде... Авыл халкы шаккатып, авыз ачып тыңла­гач, ул, кесәсенә акча тутырып, ары киткән. Икеләнүчеләр, ышанмаучылар да булган, билгеле. Ул арада энекәше авылга килеп кергән.

— Ә син нарат башындагы тегермәнне күрдеңме? — дип сораганнар аннан.

— Тегермән күрмәдем, әмма бер агай агач башыннан он капчыгы күтәреп төшә иде,— дип, сүзгә кушылган егет.

— Димәк, дөрес булып чыга инде, — дип сөенгән авыл кешеләре һәм берәм-берәм алдакчының кесәсенә акча сала башлаганнар.

Агайлы-энеле ике алдакчы әле һаман авыл саен йөреп әкият сөйли, ә халык рәхәтләнеп аларны тыңлый, ди.


Көннең кыскача яңалыклары безнең телеграм-каналда https://t.me/chelny_rt


Без Вконтактеда https://vk.com/komesh_kingiray

Следите за самым важным и интересным в Telegram-каналеТатмедиа

Безнең телеграм каналга язылыгыз «Көмеш кыңгырау»


Оставляйте реакции

3

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев