Татарстан Республикасы «Театральное Приволжье» фестиваленең округ этабында катнаша

«Театральное Приволжье» балалар һәм яшьләр театр коллективлары фестиваленең дүртенче сезоны финалында Идел буе федераль округының барлык субъектларыннан 28 спектакль катнаша (һәр төбәкнең яшьләр һәм мәктәп театрларының бер иң яхшы спектакле).

Фестивальдә театр сәнгатенең төрле төрләре һәм жанрлары тәкъдим ителгән – драмалар, комедияләр, мюзикллар, фарслар, маҗаралар, фантазияләр, пластик спектакльләр, балладалар, әкиятләр һәм хәтта эксперименталь терапия жанрындагы спектакльләр. Спектакльләрнең видеоверсияләре инде театральноеприволжье.рф проекты сайтында урнаштырылган һәм ирекле карау өчен ачык.

Фестивальнең Округ этабында Татарстан Республикасын түбәндәге спектакльләр тәкъдим итәчәк:

• «Балалар театр коллективлары» номинациясендә – «Апушның тылсымлы төшләре»  спектакле белән«Апуш» балалар театр студиясе 

• «Яшьләр театр коллективлары» номинациясендә «Яшәячәкбез»(«Будем жить») мюзиклы белән Менделеевскидан Әшрәф Ахунов исемендәге халык театры.

Менделеевск халык театрының «Яшәячәкбез» спектакле Чернобыль АЭСындагы авариядән соң төзекләндерү эшендә катнашучыларга багышланган, алар арасында менделеевлылар да булган, дип билгеләп үтте спектакльнең режиссеры Гөлназ Стрелкова. Аның сүзләренчә, спектакльдә 37 яшь актер катнашачак.

«Әйткәнемчә, Чернобыль станциясендәге авария турында күп фильмнар төшерелгән һәм анда куркыныч күренешләр күрсәтелә. Минем бу вакытта Чернобыльдә яшәгән күп санлы танышларым бар. Алар, гадәттәгечә, яшәгәннәр, яратканнар, балалар үстергәннәр. Мин үз тамашачымны коточкыч күренешләр һәм уйлап чыгарылган вакыйгалар белән куркытырга теләмим. Без ахыры өметле тәмамлана торган позитив спектакль куйдык», — дип сөйләде режиссер.

«Апушның тылсымлы төшләре» балалар спектакле бөек татар шагыйре Габдулла Тукай иҗатына багышланган. Ул драматург Равил Бохараев пьесасы буенча Мөдәррис Әгъләмов тәрҗемәсендә куелган, дип сөйләде «Апуш» балалар театр студиясе җитәкчесе Алия Фәйзрахманова. Спектакльгә музыканы композитор Зөлфәт Вәлиуллин язган, ә спектакльнең сценографы һәм рәссамы Казан сәнгать училищесы студенты, Галиәсгар Камал исемендәге театрның баш рәссамы Сергей Скомороховның укучысы Анна Новикова булган. Конкурсантлар спектакль өчен махсус тегелгән костюмнарда чыгыш ясаячак.

«Бу пьесаның драматургы шагыйрьнең күңелендә Шүрәле, Су Анасы һәм башка образларының ничек барлыкка килүе темасына үзенең фантазияләрен куллана. Ул моны кечкенә Габдулла Тукай – Апуш образы аша күрсәтә. Вакыйгалар яшь шагыйрьнең төшендә бара: ул Кырлай буйлап сәяхәт итә, анда аңа моңарчы күрелмәгән әкиятләр сөйлиләр», — дип уртаклашты режиссер.

Ул спектакльнең 15 көн эчендә куелуын һәм бу аның җитәкчелегендәге студия өчен беренче масштаблы региональ конкурс булуын ассызыклады.

«2019 елдан Татарстан әлеге федераль конкурста актив катнаша. Һәр төбәк ике генә спектакль тәкъдим итә — бер балалар һәм бер яшьләр спектакле.  Без спектакльләрне профессиональ һәм сыйфатлы итеп видеога төшерәбез, шуңа күрә белгечләргәяшь актерларның югары осталык дәрәҗәсен күрәләр. Спектакльләр якынча бер сәгать бара, фестивальдән соң аларны җирле телеканалларда күрсәтергә планлаштырабыз», - дип билгеләп үтте Татарстан Республикасы Мәдәният министрлыгының массакүләм мәгълүмат чаралары һәм иҗтимагый оешмалар белән хезмәттәшлек бүлеге башлыгы Айрат Фәйзрахманов. 

27 мартта Ижевск шәһәрендә, Бөтендөнья театр көнендә, балалар һәм яшьләр театр коллективларының округ фестивале лауреатларының исемнәре аталачак. Онлайн-трансляция барышында һәр төбәк вәкилләре сезонның иң яхшы театраль постановкалары буенча үз карарларын игълан итәчәк.

Баллар суммасы буенча «Иң яхшы яшьләр спектакле», «Иң яхшы балалар спектакле», «Иң яхшы режиссер эше», «Иң яхшы актер», «Иң яхшы актриса», «Иң яхшы музыкаль бизәлеш» һәм «Иң яхшы сәнгать бизәлеше» номинацияләрендә җиңүчеләр билгеләнәчәк.

Район фестиваленең йомгаклау этабы лидерлары – балалар һәм яшьләр студияләре яңа спектакльләргә грантлар алачак (1 урын – 250 мең сум, 2 урын – 200 мең сум, 3 урын – 150 мең сум). Ябылу тантанасы, шулай ук финалист театрларның спектакльләре телевидениедә һәм Интернетта трансляцияләнәчәк. Шул ук көнне иң яхшы театр афишалары һәм плакатлары аталачак.

Җиңүчеләрне бүләкләү апрельдә Пермьдә узачак.

https://mincult