Гыйлем — олы хәзинә

Уйлап караганың бармы, синең өчен бәхет, байлык нәрсә ул? Мөгаен, кыйммәтле телефон, колакчыннар, шкаф тулы модага кергән киемнәр булуы белән син үзеңне бәхетле саныйсыңдыр. Ә бит дөньяда акчага сатып алып булмый торган байлык бар. Ул — гыйлем, белемле булу, һәркемнең үз туган телендә аралашуы.

Гыйлемле кешене элек-электән иң байга санаганнар. Бүген дә без андыйга хөрмәт белән карыйбыз. Бигрәк тә үз телен камил белгән, туган телендә аралашкан яшүсмерләргә сокланабыз. 

Бүгенге героебыз шундыйларның берсе. Таныш булыгыз — Лаеш районы Имәнкискә мәктәбенең 5нче сыйныф укучысы Зөләйха Мөхәммәтҗанова. Ул татар теле буенча республика олимпиадасында җиңү яулаган һәм иң көчле ун катнашучы исемлегенә кергән. 

— Гаиләбезнең иң башында дәү әни белән дәү әти тора. Алар безгә — оныкларына зур йогынты ясый. Дәү әтием — язучы Мансур Шаһимәрдәнов китаплар авторы, дәү әнием тәрбияче булып эшли. Әнием Гөлнара Мөхәммәтҗанова — укытучы, әтием физик яктан бик көчле кеше. Абыйларым спорт дөньясында кайный, ә мин исә уку буенча яхшы күрсәткечләр белән сөендерәм. Бүгенге көндә догалар һәм намаз укыйм. 

— Дингә тартылуың турында сөйлә әле. 
— Балачакта, авылыбызда балалар бакчасы эшләмәгәнгә күрә, мине дәү әнием белән дәү әтием дә тәрбияләгән. Шул вакытта әбием миңа «Аллаһның 99 исеме» китабын өйрәтте. Шуннан башланды инде дингә тартылуым. Ә дәү әтием шигырьләр, әкиятләр укый иде. 

— Тагын ниләр белән кызыксынасың?
— Кечкенә чактан рәсем ясау белән мавыгам. Шулай ук инглиз һәм рус телләреннән олимпиадаларда катнашып, призер һәм җиңүче исеменә лаек булып барам. Татар теле буенча бик күп бәйгеләрдә катнашам. Җитәкчем — Мөхәммәтҗанова Гөлнара Мансур кызы. Кечкенәдән шушы өлкәдә кайнашканга күрә, елдан-ел нәтиҗәләр куандыра. 3нче сыйныфта топ-10 катнашучы исеменә лаек булып, шулар арасыннан 1нче урын яуладым. Муниципаль этапларда инглиз теленнән җиңүче һәм рус теленнән призер дәрәҗәсенә ирештем. 

— ⁠Олимпиадаларга әзерләнү күп вакытыңны аламы? Һәм синең әзерлек рецепты нинди ул? 
— ⁠Төрлечә була. Уйларга, искә төшерергә кирәк, биремнәргә җиңелчә генә карарга ярамый. Барысына да өлгерергә тырышам. Укырга бик яратам. Җәй көне ислам дине буенча укуларга йөрдем. Бүгенге көндә максатым — гарәп телен өйрәнү. Хәрефләрне таныйм, алга таба грамматикасы белән танышырга, Коръән укырга ниятлим.

Әңгәмәдәш - Гөлинә Гусамова.