Бәйрәм тюльпаннарын гадәти булмаганча куллану ысулы

Ял көннәре булгач, балалар белән мәшәкатьлерәк шөгыльләр үткәреп алсаң була, әйе бит.  Интернеттан күреп, уч-бармакларны буяуга манып лалә ясап карыйк әле, дигән уйны тормышка ашыра башлагач, үзеннән-үзе башка идеяләр дә туды.

Аппетит ашаганда килә диләрме әле?

Сезнең белән дә бүлешәсе булдым менә. Нәтиҗәдә, сенсор интеграция элементларын кулланып үткәрелә торган тулы бер дәрес килеп чыкты:
? тере лалә чәчәкләре белән танышу (иснәү - сулыш гимнастикасы, төсләре белән танышу, таҗ-яфракларын тотып карау - тактиль хисләр);
?кулларга буяулар сөртеп, рәсем ясау, тактиль хисләрне үстерү;
?база төсләрне өйрәнү яки кабатлау;
?сөйләм өчен мөһим булган сулыш гимнастикасы (коелган таҗларга берничә мәртәбә өрү - "җил ясау", балалар моны бик ярата) ;
?лалә турында мәгълүмат бирү (IQ карточкаларның артында бирелгән);
?милли тәрбия (лалә чәчәге татарларның милли бизәге, символы икәнен аңлату, фотода күрсәтелгән әсбаплар: китап, формочкалар булса, тагын да әйбәт, алай кече яшьтәге балалар яхшырак үзләштерә, әлбәттә);
?киселгән шаблоннарны төсләре яки зурлыклары буенча аеру, открытка ясау;
?китаптан алынган бармак уены - чәчәкне бармаклар белән күрсәтергә өйрәнү (мотор планлаштыру - ми эшчәнлегенә уңай йогынты)

?вакыт һәм формочкалар булган очракта, балалар белән бергәләп тәмле печеньелар пешереп, чәй эчү.

Динара Фәйрушина.

Автор фотосы.

«Истә тот» рубрикасы буенча яңалыклар