Исемегез ошыймы?

Нәркизә Мөхәмәтҗанова, Актаныш районы: 

— Ошый, әле бер көнне генә интернеттан нәрсә аңлатканын карадым, шуннан исемем миңа туры килә дип уйладым. Матур, кара күзле дигәнне аңлата. Дөрес, аны әле дөрес әйтмиләр, Нәргизә диеп дәшәләр. 
Нәркизә нарцисстан алынган инде ул, чәчәк исеме. Безнен гаиләдә гел чәчәк исемнәре: Миләүшә — әнием, апамнар — Резеда, Лилия, Ландыш, иң кечкенәсе — мин.

Нәфисә Шәяхмәтова, Мамадыш районы:

— Минем исемемне күп кеше дөрес әйтми. НафИса дип әйтәләр, басымны икенче иҗеккә ясыйлар. Яратмыйм да инде шулай әйткәннәрен. Исемем миңа бик ошый, ниндидер татар моңы килеп кушылган шунда. Интернетка ышансак, минем исемем төректән килгән, әмма мин моңа ышанмыйм. Миңа әти белән әнинең Диләрә дип исем кушасы килгән, Диләрә дип безнең якын туганнар кушкан да, кире уйлаганнар. Әби исем куюны үз кулына алган, мине күрүгә Нәфисә дип кушкан. 
Интернетта минем исемем «драгоценная, бик көтелгән» дигәнне аңлата. Бу миңа бик тә туры килә, чөнки мин гаиләдә көтелгән кыз. Ике абыемнан соң, мин көтелгән КЫЗ. Менә шушылай...

Фирүзә Ибраһимова, Яңа Чишмә районы:

– Менә минем исемем фарсы теленнән «бәхет ташы» дип тәрҗемә ителә, гарәп теленнән «уңыш һәм җиңү китерүче таш» дип. Интернет челтәре «Фирүзә» турында шулай ди: «Әлеге исемне йөртүчегә күп төрле уңай сыйфатлар хас, ул — ярдәмчел, игътибарлы, яхшы күңелле, талантлы һәм якты шәхес. Бер яктан карасаң, кызык инде. 

Рәйсә Абдуллина, Балтач районы:

– Миңа да исемем бик ошый! «Рәйсә» дип әбием истәлегенә кушканнар. Төскә-биткә дә, холыкка да тач үзе, ди әти-әнием. Рәисә җитәкче дигәнне аңлата икән. Әмма мин — Рәйсә, бу назлы, мөлаем, йомшак холыклы дигән сүз. 

Азалия Сабитова, Арча районы:

– Миңа исемне популяр булганга кушканнар. Ике кешенең берсе — Азалия исемле кебек бит инде хәзер. Шуңа озак кына «Азалия» дип дәшүләрен теләмәдем, исемемне үзгәртү теләге белән янып йөрдем. 
Болай карасаң, начар исем түгел инде. Татарларга да хас, русларга да ят түгел. Универссаль, ике телдә дә бертөсле языла. Тик күпләр исемемне татарча әйткәндә калынайтып әйтәләр. Менә монысы ошамый инде. «Азалия» — гарәп исеме. Рәсәйдә аны күбесенчә мөселман кызларына кушалар. Мәңгелек дип тәрҗемә ителә. «Ут чәчкәсе» дигән вариант — иң отышлысы минемчә. 

Ләйлә Нуриева, Актаныш районы:

— Исем кеше турында күп нәрсәне сөйләп бирә ала, ләкин кайбер очракта исем җисеменә туры килмәскә дә мөмкин... Менә мәсәлән, минем исемем — Ләйлә, ул — төн, караңгылык дигәнне аңлата. Ә чынлыкта мин «кояш кызы» — сипкелле, сары чәчле, ак тәнле. Бу исемне миңа карт дәү әнием куштырган. Исемем ошый, ләкин аны рус телендә ничек кенә итеп язмыйлар: Лейля, Ляйля, Лайла....