Дусларыбыз артты!

Чаллы шәһәренең 12нче мәктәбендә мастер-класс үткәреп кайттык. Һәр яңа очрашу ул – яңа ачыш. Менә дигән итеп туган телебездә сөйләшүче Камилә, Зәлинә, Данияр, Ралиналар укый биредә. Шигырь-әкиятләр язып караучылары  да бар. Үз шигырьләренә җырлар язып караган Дамир Сәлахиев, менә дигән итеп үз шигырен укыган Илдан Мубараков бигрәк тә сөендерде. «Илһам һәрвакыт килми, гел язып булмый», – ди Дамир. Әлбәттә инде. Ләкин тырышларны, максатчаннарны ярата ул. Сүзләргә рифма эзләгәндә, шигырь юлларын дәвам итеп караганда, моның шулай икәнлеген үзләре дә күрде алар. Башта акрын-акрын, ышанычсыз адымнар белән, аннары ашыгыбрак килә икән ул кирәкле сүзләр. Эзләргә генә кирәк.

Ә инде «Көмеш кыңгырау» газетасында булган «Яшьтәшемә биш сорау» яки «Сораштыру» рубрикасына язуның бер кыенлыгы да юк икәнлеген балалар шунда ук аңладылар. Үзләре дә тиз-тиз генә җавап та биреп алдылар.Супер-герой булсалар, гел яхшылыклар эшләп йөриячәк балалар ич алар! Хоббилары да бик-бик күп! Алга таба безнең газетада 12нче мәктәп укучыларының язмаларын да ешрак күрербез әле без. Мин моңа ышанам.

Лилия Фәттахова.