Сихерче

Бүген иртән искә төшердем,

Көзге букет – кипкән камышлар.

Әллә камыш мине уйната?

Мин һавада, алар болытлар.

Киптергән камышны селкегәч,

Биләде күңелне иркенлек.

Башланды мамыклар агышы

Тарала камыштан сихрилек.

Камыш арты, камыш таратам,

Иртәнге тынлык, уяна җан.

Сихерләде камыш мамыгы

Күңелдә рәхәтлек, йоклый аң.

Очучы күңелем – мамыкта,

Тирәмдә болытлар, әкият.

Очамын, биимен, күрмимен

Сизмимен башканы, рухият.

Бүгенге балага юаныч

Кулдагы телефон – ул камыш.

Күзәтеп “интернет мамыгын”

Баланы очрата зур тормыш.

Яңарыш бирде иркенлек, тик

Бүгенге балалар – балык ул.

Күңелне бикләүче, сихерче

Кулдагы телефон – кармак ул.