Суыткыч иясе

Йорт иясе булган кебек,

Бар суыткыч иясе.

Очратканыгыз булгандыр,

Бәлки, сез дә берәрсен.

Утыра ул суыткычның

Иң салкын киштәсендә.

Бик уңайлы сизә үзен,

Капланса да бәс белән.

...Бүген хәлләр гел башкача

Суыткычта эри боз,

Героебыз, тирләп-пешеп,

Төзеп маташа ребус.

Ребустагы һәр цифрны

Хәреф белән томалый,

Ял иткән вакытларында,

Татлы туңдырма ялый.

Эше уңай баруына

Шат суыткыч иясе,

Сыр кисәгенә сырлады:

«БӘС + БӘС = ЭССЕ».

«Суыткыч иясе юк!» дип,

Кайсыбыз әйтә ала?!

Ребусын чишкән вакытта,

Син дә туңдырма яла.