Дәвамлы табышмаклар

* * *

Көзгә керде куаклыклар —
Тәлгәшләргә бай алан!
Әнә, кызыл алка тагып,
Елмая сылу б....

* * *

Кети-кети уйнаткалый
Бармакларын — күр әле!
Урман сарыгы димәгез:
Бик үчле ул — ш.....

* * *

Гүя Җир-ананың күзе —
Анда шулкадәр тоем!
Шифалы су, пакъ моң белән
Мөлдерәмә тулы к...

* * *

Орлыкларын ипләп чәчсәң —
Кызгылт казык җир тишәр:
Куяннарга гына түгел,
Безгә дә кирәк к....

(Балан, шүрәле, коем, кишер)

* * *

Серле сөт эчендә торам,
Сөте дә — гел пар сыман.
Болыннарны урый-урый,
Уза иртәнге т....

* * *

Җиз батыркай безне көтә,
Түтәлгә ятып чалкан:
Бик тә сусыл, 
бик тә тәмле
Ошбу яшелчә — ш.....

* * *

Ике таҗлы сихри чәчкә -
Илаһи җанлы бүләк!
Күңелләргә тылсым сибә
Очып үткән к......

* * *

Йөрәк тибешен кабатлый,
Гүя кайтаваз — елау:
Яз үткәндә
бик ямансу
Була икән т.......

(Томан, шалкан, күбәләк, 
тамчылау)

* * *

Яфракларга ясин укып,
Җилгә боера: — Син өз!
Сагыш кәфенлеген тукып 
— Мәңгелеккә килә к...

* * *

«Ау-у!» — дисәң, «У!..»- гына ди.
«Кул!» — дисәң, үртәли: «Ул...»
«Саз!» — дисәң, үртәли: «Аз!..» —
Шаян дускай к.......

* * *

Яшь айдай нәзек булса да,
Үләнне йөри турап,
Иген кырына да чыга
Тынгысыз тимер у...

* * *

Тешләрен ырҗайтып ята —
Аңа басам дип торма!
Басканның башына бәрә,
Ялгышкан өчен т....

( Көз, кайтаваз, урак, тырма)

* * *

Камышлар белән камалган
Алыптай зур зәңгәр Нуль —
Балыклар да белә моның
Нәрсә икәнен: бу — к...

* * *

Түм-түгәрәк булып үсә,
Йөзләре гүя табак.
Җир шарына да охшаган
Көзге бакчада к....

* * *

Меңләгән яшел энәле
Күлмәктә, безгә карап
Торадыр ул
ямьле генә:
Тәүге исеме — н....

* * *

Бер дустым бар — 
ут тоткандай
Бик җитез, шаян, хиси:
Кичәге көнен тоткандай,
Үз койрыгын тота п...

(Күл, кабак, нарат, песи)

* * *

Аның берлән
олтан салсаң —
Карда кала матур эз.
Үзе бер генә булса да,
Горур атала ул — б...

* * *

Аны кулга тоту белән,
Ашлар ашарга ашык!
Бик тә җайлы, 
бик тә кирәк:
Аның исеме — к....

* * *

Бер сөенеп, бер көенеп,
Карыйсыз йөзегезгә:
Таныйсызмы? 
Каршыгызда
Тылсымчы түгел — к....

* * *

Күлдә патшадай йөрүче,
Балыкларның үз бүресе.
Кыяфәте дә — солтан!
Кем соң ул, 
дуслар? — ч.....

(Без, кашык, көзге, чуртан)

* * *

Бөтен дөнья — ак учактай:
Дөрли кыр, дөрли урам.
Дөрләсә дә, мөхит — якты!
Учакның исеме — б....

* * *

Тәмләп ашагач ашын,
Кешнәп
болгыйдыр башын. 
Аны тану бик ансат:
Арбаны тарта кем? — а...

* * *

Тавыкны төштә йөдәтә
Шуны күрү нибары.
Кырда — яшел, 
өйдә — сары:
Нәрсә ул, дустым? — т...

* * *

Бу асыл кошлар турында
Йөзләгән җыр җырлана.
Җылы яктан өчпочмактай
Очып кайта т.......

* * *

Вакытны гел барлап тора:
Көне дә, ае да бар!
Аңа карап, планнар корам,
Чөнки ул бит к........

(Буран, ат, тары, торналар,
календарь)