Гөмбәдән шашлык

Иттән ясаган шашлык бер читтә торсын. Гөмбәләрне ярты сәгатькә маринадка салып торырга һәм агач таякчыкларга (шпажкаларга) тезеп духовкада пешерергә генә кирәк.

Кирәк була:
Шампиньон гөмбәсе — 600 г,
Лимон согы — 2 аш кашыгы,
Соя соусы — 4 аш кашыгы,
Укроп — бер бәйләм,
Паприка — 1 аш кашыгы,
Көнбагыш мае — 4 аш кашыгы,
Тәменчә тоз.

Эш барышы:
Гөмбәне яхшылап юыгыз. Чиста сөлгегә тезеп киптерегез.
Гөмбәләрне пакетка салыгыз һәм үсемлек мае, соя соусы, паприка, тоз, лимон согы, шулай ук вакланган укроп өстәгез.
Пакетның авызын бәйләп яхшылап селкетегез дә 30 минутка калдырып торыгыз.
Агач шпажкаларны суда чылатыгыз. Маринадланган гөмбәләрне шпажкаларга тезәргә кирәк. Тезеп бетергәч, шпажкаларны табага яки противеньга урнаштырып 15 минутка 200 градуслы духовкада пешерегез.

Ашларыгыз тәмле булсын!