Көмеш кыңгырау

Җәйге теләк

Мансур Сафинның яңа шигырьләре.

ҖӘЙГЕ  ТЕЛӘК

Күмәч пешер!

Компот кайнат!

Җиләк-җимешен аша!

Җәйнең тылсым җәймәсендә

Хыяллар чынга аша.


РӘХМӘТЛЕ ТИЕН

Тиен агачтан төште дә,

Кешедән кәнфит алды:

Бүләк өчен рәхмәт укып,

Артыннан карап калды.

Күбрәк булсын иде җирдә

Кеше һәм хайван андый –

Бер-берсенең ышанычын

Алмасын иде  алдый.


ТРОЛЛЕЙБУС

Болан кебек җитез йөри –

Көн дә маршрутка чыга!

Кайчак машина артыннан

Талпына кыр-басуга.

Әмма тимер бау мөгездән

Тартып, һич ирек бирми...

“Троллейбуслар кырда, - ди ул. –

Гомер-гомердә йөрми.”


УЕНЧЫК  МАШИНАМ

Машинама сөенеп карыйм:

Тора тулпарга охшап!

Ял кебек тәрәз ялтырый,

Утыргычлары йомгак!

“Кереп утыр!” – дигән сыман,

Көр тавыш сала: “Би-бип!”

Урам буйлап чабар идек,

Тик мин аңа сыймыйм бит...


ТАЛ  ПЕСИЕ

Тал песиен алып кайттым,

Назлы кочаклап яттым:

Төшемдә йөрде мияулап –

Биллаһи, үзем бактым!


ЛИСӘПИТ

Өч аяклы атта чабам,

Аяклар җиргә төшми.

Сигнал рычагына бассам –

Кыңгырау булып кешни.

Лисәпит диеп атала

Бу мөгезле дускаем.

Сер түгел лә: ул абынса –

Ияреннән очкалыйм...

Тик шулай булса да, аны

Яратуларым хәйран:

Аның белән бергә булган

Һәр мизгелкәем – бәйрәм!


СИХРИ СУКМАК

Ап-ак юл суза самолёт –

Галәмгә сихри сукмак!

Шул сукмактан менәм айга,

Китмәсен кичен йоклап.

Йолдызларга су сибәрмен –

Чәчәк атсыннар гөрләп:

Төн җитсә ни! Чын егеткә

Килешми йөрү шүрләп.


ЯМЬЛЕ  БОЛЫН

Шулай күп итеп болынга

Кем төрле чәчәк чәчкән?

Гүя бар тирә-як яме

Шушы җәннәткә күчкән!

Әй беләм лә! Таң-тылсымчы

Апа тырышлыгы бу:

Шул болынга килеп чыгу –

Гүя  могҗиза  табу.


ЭЛЕКТРОН  ПОЧТА

Төймәләргә басып язгач,

Интернетта хат юллыйм –

Конвертка да салып тормыйм:

Урам, йорт санын куймыйм.

Барып җитә ул барыбер –

Таба кирәк кешене!

Уйланам: бу электрон почта

Әллә алла эшеме?..


ТУКРАН  ТӘҮБӘСЕ

Иртә таңнан ук шакый:

– Тук-тук-тук!

– Кунакка килдеңме?

– Юк, юк, юк.

– Әллә соң син ачмы?

– Тук. Тук, тук!

– Кәефләрең шәпме?

– Шук, шук, шук!..


ТОМАН

Гүя зур ап-ак кәрван,

Кыр буйлап уза томан:

Бик тә ач дию сыман,

Йота юлда һәр затны...

Менә йотты ул агачны,

Арбасы белән атны.

Бер мизгелдән

мине йоттты,

Томанда йөзәм - шатмын!..

Гүя зур ап-ак кәрван,

Кыр буйлап уза томан.


ЭНЕМ  ТУДЫ!

Сөенеч белән

күңелем тулды –

Бу айда энем туды:

Мин хәзер өлкән, абый –

Түгел бер нәни сабый:

Хәзер җитдирәк атлыйм,

Уенчыкларны ватмыйм,

Китап-дисклар әзерлим –

Киңәшче дә хәзер мин!

Көнләшегез,

дус-ишләрем –

Ал да гөл бар эшләрем:

Бәхетле дә мин, бай да –

Энем туды бу айда!

СИХРИ   ТАҢ

Биек-биек йолдызларда

Бөек хыял утлары:

Гашыйк итә, сокландыра

Күкнең алтын  уклары!

Эчәм җирнең илһам суын

Ал  офык  кулларыннан –

Йөрим тормыш гамен куып,

Киек Каз  юлларыннан.

И бу җәйнең сихри таңы:

Күңелемдә – серле чаңы!..

ПЕСНӘК

Мине юатып   иртән,

Песнәк  тәрәзгә  чиртә,

Гүя әйтә:

- Күр, дустым,

Тагы бер көнгә үстем!

Мин сөенәм, аны  күреп,

Бахбай да куя өреп:

– Әйе, - ди, - безгә сөенеч,

Синдә булса  егәр-көч!

Канатларын

дәртле җилпеп,

Җим өчен рәхмәт укып,

И тырыша нәни дустым,

Мизгел-бөртекне чукып.

ДУСЛАР

Мин чокырга егылмадым,

Егылды аңа  Госман, -

Әмма без бергә елыйбыз,

Чөнки без – якын дуслар!..

КҮЛӘГӘМ  БЕЛӘН  БЕРГӘ

Күләгәм белән бергәләп

Без көне  буе йөрдек –

Бергә укыдык, уйнадык,

Хәтта  бергә су кердек.

Тәмам арып өйгә кайткач,

Яңа шәп  планнар кордык,

Күләгәм белән дусларча

Чәйләр эчеп утырдык.

Инде черем итәргә дип,

Башым төртсәм кроватка, -

Ул да миннән ял итәргә

Каядыр  барып  яткан...

ТАКСИСТ

Барча таксистлар – шахматчы,

Тик вакытлары бик сай.

Пассажирлар  ашыга шул:

Лондон, Гвинея Бисау...

Хәтта Карпов  утырса да,

Уйный  алмый – ашыга.

Ул  юлларның барысын да

Таксист  юрый  яхшыга!

 ТУКАЙ  АБЫЙ  КЕБЕК

Мин әле  нәни булсам да,

Тукай абыйны беләм:

Аның кебек  зур үсәрмен,

Алырмын кулга каләм,

Иҗат итәрмен   шигырьләр,

Матур-матур  әкиятләр -

Аның кебек, мин дә, дуслар,

Дөньядан мәңге  китмәм!

Моң җыеп күңел түремнән,

Җырлармын да, җырлармын:

Тукай абый кебек. Данга

Үзебезнең  чорларны.

Илһам биргән  сөенечне

Сезгә бүләк  итәрмен –

Иҗат арбасыннан төшми,

Йөз яшьләргә  җитәрмен!

Тукай абый кебек, мин дә

Телим  мәңге  яшәргә:

Язган әсәрләрем аша

Киләчәккә  дәшәргә!

ЗӘҢГӘР  КОЯШ

Бер хыялый малай

зәңгәр кояш

Ясый ап-пакь битле альбомга.

Зәңгәр кояш?

Каян килеп чыккан?

Кем өйрәтте сине ялганга?

- Бар, - ди малай, -

андый сәер кояш!

Серле офык аны тудыра:

Могҗизалы кояш балкышында

Зәңгәр күлмәк киеп,

 зәңгәр күзле

Минем сөйгән кызым утыра.

СОЛДАТЛАР

Озакламый шинель кияр абыем –

Сугышчылар сафында  атлар,

Әмма куркам,

аның өчен куркам:

Кешеләр бит – бик нәзек затлар, -

Әнә суда бата, утта яна

Хәтта җансыз

кургаш солдатлар...

КҮБӘЛӘК

Һаваны сыйпый канаты –

Чәчкә таҗы мәллә ул?

Җәйге гүзәл аланнарда

Аның алдында –

мең юл!

Узып китә, көнләштереп –

Ничек татлы җилпенә!

Тоям: үзем дә,

дәртләнеп,

Шул назлы күккә менәм!

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: