Убырлы чокырлар, өй һәм абзар ияләре һәм башка хикмәтләр турында

СЕРЛЕ САНДЫК

Өй эчендә серле сандык тора күптән.

Шул сандыкка кызыксынып күзем төшкән.

— Ни бар? — диеп уйланамын — эчләрендә?

Кайчак күрәм хәтта менә төшләремдә

Без бар чакта әби аны бер дә ачмый

Үзе генә калгач аны бары карый.

— Нинди серләр бар соң анда, әби? — димен, —

Әйтче миңа шул серләрне, мин дә белим!

Әби әйтә: “Анда минем яшь чакларым,

Яшьлектәге мизгелләрнең ак чакларым,

Килен булып төшкән монда вакытларым,

Шатлыкларым белән бергә сагышларым;

Минем анда кунак булып йөргән чагым,

Бәйрәмнәрдә камзул ука шәлем тагын;

Сабан туйлар, каз өмәсе, аулак өйләр,

Ашлык чәчкән, печән чапкан вакытларым”.

“Бабаң белән дөнья көткән елларым, — ди;

Тәпи басып киткән чагы улларның, — ди;

Икмәк басып аш пешергән кичләрем, — ди;

Сабыйларым белән күргән төшләрем”, — ди.

“Ул сандыкта матур көмеш беләзегем,

Түшләремдә тагып йөргән көмешләрем

Тагын нәрсә әйтим икән сиңа, улым? —

Әйтеләсе-әйтелмәсе күп серләрем...”

Менә аның бөтен сере шушы инде.

Хәтерләтә миңа гүя озын көйне;

Түребезгә ямен өстәп әле дә менә,

Серле сандык бизәп тора безнең өйне.

                                1999, 15 декабрь

ӨЙ ИЯСЕ

Өчиледә — өч идән.

Чыгып килә кич өйдән

(Көчкә ди килгән көйдән),

Үзе өч бишмәт кигән;

Буе чүт озын чөйдән,

Үзе чыга ди өйдән.

Өчиледә — өч идән.

Кем чыгып йөргән өйдән?

Өстенә бишмәт кигән.

Көчкә ди килгән көйдән

Буе чүт озын чөйдән,

Чыгып килә ди өйдән.

Өчиледә — өч идән.

“Килә-килә” — ди! белгән! —

“Өй иясе” — ди! йөргән.

Менә аны кем күргән? —

Буе чүт озын чөйдән,

Үзе чыга, ди өйдән

           1999, август

УБЫРЛЫ ЧОКЫР

Убырлы чокыр.

Нәрсәдер очар,

Уйларны кочар;

Үзеңне тотар —

Кем-кемне отар?!

Убырлы чокыр...

Уйларың кызар,

Ниләрдер узар;

Кулларың сузар...

Теләсә — куар,

Теләсә — тотар.

Убырлы чокыр! —

Юк нәрсә юктыр!

Теләсәң,тик тор.

Бер нәрсә юктыр —

Әкият шулдыр.

         1999, 3 август

КЫРМЫСКАЛА

“Кырмыскала” —

Дип атала

Шул урманда

Матур кала.

Эшләп ята

(Бик күп анда),

Яшәп ята

Кырмыскалар —

Тырыш бар да.

Кырмыскала —

Матур кала,

Мәшһүр кала!

Бик күп катлы,

Биек башлы

Эшләп ята

Кырмыскала

Эшчән алар —

Кырмыскалар.

Кырмыскала —

Бик зур кала.

Анда бара,

Монда бара:

Тырыш алар,

Төзи алар

Бик зур кала —

Кырмыскала.

          1999, 4 август