Көмеш кыңгырау

Ркаил Зәйдулла әлифбасы

Быел танылган язучы һәм шагыйрь, Татарстан Язучылар берлеге җитәкчесе Ркаил Зәйдулла 60 яшьлек юбилеен билгеләп үтә. Шул уңайдан Ринат абый Мәннан шагыйрьнең иҗатын багышланган игъри әлифба язган.

А
Аны белә, һич шигем юк,
Һәрбер кыз, һәрбер малай,
Китапларын бик яратып
Укый әби һәм бабай.
Ә
Әкият-хикәяләрнең
Менә дигән остасы,
Шигырьләре искитәрлек,
Озыны бар, кыскасы.
Б
Борынгы чор тормышын да
Язып бирә тәфсилләп,
Бүгенгесен дә яза ул
Ялкынланып, бик теләп.
В
Вакытын бушка уздырмый,
Китап укый, ярата,
Тарихка килгәндә, аны
Ярата аерата.
Г
Галәм турында уйлана,
Омтылышы гел алга.
Мәктәпне тәмамлагач та
Керә ул “Универ”га.
Д
Дәртләнеп укый анда да,
Уку – могҗиза!
Шигъриятны да онытмый – 
Яза да яза!
Е
Еракта калса да инде
Мәктәп еллары,
Көн саен дәфтәргә куна
Шигъри юллары.
Ё
Ё хәрефенә бер сүз бар,
Ул сүзне һәркем белә.
Яңа елда кулланыла
Татар сүзе булмаса да.
Йәле, кем әйтеп бирә?
Ж
Журнал-гәзитләрдә эшли:
“Сабантуй” булсын, “Идел”,
“Татарстан яшьләре”ндә.
Тырыш һәм эшчән абый ул,
Моны, дустым, яхшы бел.
Җ
Җиткәндер вакыт әйтергә
Сүзем кем турында дип.
Тукай бүләге иясе
Ркаил абый Зәйдулла – 
Танылган шагыйрь, әдип.
З
Зәвыклы, матур китабы
Менә минем кулымда.
Исеме “Сабантуй сөлгесе”,
Безнең бәйрәм турында.
И
Иң көткән бәйрәмебез ул,
Бөек татар бәйрәме.
Язгы кыр эшләре беткәч,
Үткәрелә. Бел, яме!
Й
Йола буенча башлана
Бәйрәм бирнә җыюдан:
Чиккән сөлге, яулык, кәрзин
Йомырка белән тулган...
К
Күп җыела. Һәрбер өйгә
Җыючылар туктала.
Шаяру, көлеш урамда,
Катнаша байтак бала.
Л
Лаф орырга җыенмыймын,
Сөйләп бирәм барын да.
Сабантуй уза, гадәттә,
Урманның аланында.
М
Мең еллар шулай булган ул,
Хәзер дә шулай бара,
Мәйдан уртасында биек
Утыртыла багана.
Н
Ничек кенә тырышсаң да
Өскә менү бик авыр,
Җитмәсә бит карап тора
Җан атып бөтен авыл!
Ң
Зеңгелдәп чүлмәк ватыла...
Утырмале су кабып,
Койрыклы хәрефне миңа
Күрсәтче сүздә табып.
О
О, Сабантуй, сабантуй – 
Татар халкы бәйрәме,
Эшләрнең беткән чаклары,
Җәйләрнең килгән мәле.
Ө
Өметләнеп кашык кабып,
Әй йөгерә апалар, -
Берәм-берәм җиргә төшеп,
Ватыла йомыркалар.

П
Палас-мәйдан  гөрләп тора – 
Җыр-биюе, көлкесе!
Җилферди зәңгәр күкләрдә
Сабантуйның сөлгесе.
Р
Рухланып кемдер йөгерә,
Кем – колганың очында...
Сабантуй батырын көтеп,
Шук тәкә тыпырчына.
С
Сынап карыйлар көчләрен
Көрәшләрдә абыйлар,
Яулык белән күзен бәйләп,
Чүлмәк вата бабайлар.
Т
Тырышып гармунчы уйный,
Бию көен сыздыра,
Барча кошлар тынып кала,
Бөтенесен уздыра!
У
Уеннарның иң кызыгы – 
Акча эзләү катыктан.
Көлә-көлә эчең ката,
Әйтерсең лә кытыктан.
Ү
Үзәктә ат чабышы да,
Нинди генә атлар юк,
Җайдакларның берсенең дә
Артта калу уе юк!
Ф
Форсаттан файдаланып мин
Игълан итәм: бүген без
Ркаил абыебызның
Тагын бер матур китабын
Телгә алып китәрбез.
Х
Хәзинәләр кайда була?
Тынып торам бер мәлгә.
Белмисезме? Ә мин беләм.
Әйтәм – Сары кирмәндә!
Шул исемле бар китап,
Киштәләрдән эзләп тап.
Һ
Һәр малай-кызга бу китап,
Иманым камил, ошар.
Сер итеп әйтәм: китапта
Тагын дүрт әкият бар.
Ц
Циркка барганың бардыр,
Аюны да күргәнсең...
Ә аюкай куянны син,
Әйтеп бирче, беләмсең?
Белмәсәң, укы китап,
Әкиятне эзләп тап.
Ч
Чал бүре сүзе истә,
Күңелгә җылы тула:
“Игелек итсәң генә,
Яхшылык көтеп була”.
Бу – “Бүре җиләге”ннән,
Әйтелгән йөрәгеннән.
Ш
Шыгрым тулы алтын-көмеш
Сары кирмәндә була...
Тик эшләп тапкан мал гына
Бәрәкәтле! Бел, бала.
Щ
Бу хәрефкә бар тик өч сүз – 
Щётка, щи һәм щит.
Татар сүзләре түгелләр.
Еш кына без куллансак та,
Алар безгә чит.
Ъ, Ь
Менә ике хәреф сиңа:
Ъ – катылык һәм Ь – нечкәлек.
Алар сүз башында булмый,
Бик күп китап актарсаң да,
Карасаң да текәлеп.
Ы
Ышанасыңмы син юкмы,
Ике башлы дию бар!
Ркаил абый китабын
Китапханәгә барып син
Сорап ал әле, зинһар.
Э
Энем белән кичә бардык
Кариев театрына.
“Айрыз батыр” спектаклен
Рәхәтләнеп без карадык.
Нәниләр дә, зурраклар да – 
Урын җитте барына.
Ю
Юк әле, бетмәде сүзем,
Өзелмәсен арабыз.
Безнең халык шагыйребез
Ркаил абый тагын язсын,
Шуны теләп калабыз.
Я
Яхшы булды. Рәхәтләндек.
Утырмадык тикмәгә.
Ә калганын сез укырсыз
Барып китапханәгә!

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: