Мин яратам әле!

Икәү генә без дөньяда...

Икәү ак кар эчендә.

Ява ак кар...

Безне яклар,

Безне аклар өчен дә!

Ә син нәкъ кар бөртегедәй –

Очасың канатланып.

Бу мизгел йөз елга бер дә

Тормыйдыр кабатланып.

Мәхәббәтебезнең, әйдә,

Сурәтен ясыйк карга! – 

Нишләсәң дә килешә ул, 

Килешә гашыйкларга. 

Хисләргә, япь-яшь хисләргә

Йөрәк кенә чыдармы?

Әллә инде күкрәгеннән

Йөрәк очып чыгармы?!

Чыкса чыгар!

Нишләсә дә

Йөрәгем үз эшендә.

Мин яратам әле! Димәк

Мәхәббәт үз көчендә!