КЫШ БАБАЙ КИЛӘ!

Карлар каплап китте җирне,

Ак булды безнең урам.

Бу кем эше? – дип сорамыйм,

Бик яхшы белеп торам.

Бу, әлбәттә, ак мыеклы,

Ак сакаллы Кыш бабай.

Аны һәр кыз яхшы белә,

Аны белә һәр малай.

Ел саен ул безгә килә,

Капчыгы – иңнәрендә,

Кар кызы белән килә ул

Декабрь көннәрендә.

Яшел чыршы – бизәкләрдә,

Ямьле безнең өебез.

Кыш бабай, Кар кызы белән

Җырлыйбыз да биибез.

Яңа елны каршылыйбыз

Дусларым белән бергә.

Бәхетле булсын Яңа ел,

Бәхет керсен һәр өйгә!