Китап укучылар бергә җыелды!

Китап укырга яратучылар отряды ул. Исеменнән үк аңлагансыздыр, анда китап укырга яратучы малайлар, кызлар йөри. Җәй җитеп, мәктәпләрдә укулар тәмамлану белән, отряд үз эшен башлап җибәрә. Түбән Кама шәһәренең үзәкләштерелгән китапханәләр берләшмәсе каршында эшләп килә ул.

Җәй көне кем китап укый инде, дип уйлагансыздыр инде, әйеме? Укыйбыз шул менә! Укытучылар җәй көне укырга дип бер озы-ын исемлек бирәләр бит. Яңа китаплар белән дә танышабыз әле, саф һавада кызыклы уеннар уйныйбыз. Ә беркөнне Кол Гали исемендәге милли китапханәдә эшләүче апалар оештырган квест-уенда катнаштык һәм Салават күперенә югалган төсләрен табарга ярдәм иттек, асфальтта рәсем ясап, осталыкларны күрсәттек, ике командага бүленеп, эстафетада көч сынаштык.

Отрядка йөрүче малайлар, кызлар белән дуслашып беттек инде. Киләсе җәйне дә, быелгысы кебек, бергә уздырырга сүз куештык.

Айгөл ГӘРӘЕВА, Түбән Кама шәһәре.