Актанышның «Туган як» музеена сәяхәт

2023 елның 4нче декабре көнне, без, Актаныш районы Аккүз төп гомуми белем бирү мәктәбе укучылары Актаныш «Туган як» музеенда булдык.

Музейга билетларны «Пушкин картасы» ярдәмендә алдык. Актаныш район музее үзенең эшчәнлеген 1975 елдан алып бара. Ул тулысынча безнең туган ягыбызга багышланган һәм бүлекләргә бүленеп экспонатлар урнаштырылган.

Музей директоры Аглетдинов Мирсил Магис улы ата-бабаларыбызның көнкүрешен аңларга һәм асылына ныклап төшенергә ярдәм иткән төрле экспонатлар белән таныштырды, Актаныш җирлеге тарихын җентекләп аңлатты. 

Без монда үзебезнең районда яши торган җәнлекләр, кошлар, балыклар һәм бөҗәкләр төрләре белән таныштык. Мамонт сөякләре, элек кулланышта булган хезмәт кораллары, авыл өенең эчке һәм ишегалды күренешләре белән таныштык. Бигрәк тә безгә ХІХ гасыр ахыры — ХХ гасыр башы татар йорты интерьеры ошады. Районыбызның күренекле кешеләре турында бик күп мәгълүматлар сакланганын күрдек.

Бу экскурсиядә без бик күп мәгълүматлар алдык, яңа белемнәр тупладык. Актаныш «Туган як» музеенда булсагыз, үкенмәссез!

Актаныш районы Аккүз мәктәбенең 9 нчы сыйныф укучысы Шәйдуллина Ильвина.