Ни өчен мәче ашагач юына?

Беркөнне Мәче Чыпчык тоткан. Мәченең тамагы бик ач икән, ул шундук Чыпчыкны кабып йотмакчы булган. Чыпчык әйткән:

— Син нигә мине юынмыйча ашыйсың? — дигән.

Мәче юынмыйча ашарга ярамаганлыгын исенә төшергән, башта бер тәпиен, аннары икенчесен юган.

— Ә битеңне кем юа? — дип сорый икән батыраеп алган Чыпчык.

Мәче бу юлы да Чыпчыкны тыңларга булган. Ике тәпиен дә күтәреп, йөз-битен юа башлаган.

Чыпчыкка шул гына кирәк — очкан да киткән.

Шуннан башлап мәчеләр ашагач кына юына башлаганнар.