Татарстаннан 300дән артык укучы бизнес-кейслар чемпионатында катнашты

22нче мартта «Мәктәп бизнес-старты» республика масштаблы проектының чираттагы этабы узды. Чарада республиканың төрле шәһәрләреннән һәм авылларыннан 300дән артык урта мәктәп яшендәге бала катнашты.   

Аны уздыру вакытында Татарстан укучылары гамәлдәге эшмәкәрләрдән гамәли биремнәр алдылар: балалар бизнес алып барганда килеп чыга торган проблемалы ситуацияләрдән чыгу буенча үз вариантларын тәкъдим итәргә тиеш иде.

Мәсәлән, булачак эшмәкәрләргә бәйрәм һәм ял көннәрендә генә түгел, ә эш көннәрендә дә күңел ачу үзәгенә клиентларны ничек җәлеп итәргә; балаларны йога секциясендә ничек шөгыльләнү белән кызыксындырырга; хезмәткәрләрне компаниядә үсүгә һәм үсешкә ничек этәрергә һ.б. турында уйларга туры килде. Булачак эшмәкәрләргә барлыгы биш бизнес-кейс тәкъдим ителде. 10 көннән соң һәр команда теге яки бу мәсьәләне хәл итү буенча үз вариантларын тәкъдим итәргә тиеш булачак.

Бу эшне уңышлы башкарган 30 мәктәп командасыннан 12се сайлап алыначак. Нәкъ менә алар 18 апрельдә Казанда узачак бизнес-кейслар чемпионатының чираттагы этабына күчә. Соңыннан, барлык 12 команда да финал слетында катнашачак, анда алар үз бизнес-проектларының финанс нәтиҗәләрен тәкъдим итәчәк. Нәтиҗәдә, җиңүчеләрнең өч командасы Мәскәүгә барачак.