Көрәшче булыйм дисәң

Милли көрәш — төрки халыкларның милли спорт төре. Татар-башкортларда, чуашларда Сабан туе бәйрәменең мөһим элементы булып тора. 

Көрәш — иң борынгы спорт төрләреннән берсе. Ул бигрәк тә төрки дәүләтләрдә киң таралган. Үзбәкстан, Кыргызстан, Монголия милли көрәше татар көрәшенә охшаш. Ләкин аларда аяк чалырга рөхсәт ителә, ә татар көрәшендә — тыела. Татар көрәшендәгечә кул көчен кулланып, көндәшне әйләндереп аркасына салу исә аларда юк. 

Көрәш Россиядә милли спорт төрләре исемлегенә кертелгән. Бөтенроссия ярышларында җиңүчеләргә спорт мастеры исеме бирелә. Татарстанда көрәш, спорт төре буларак, 1920 еллардан үсеш ала.

Милли көрәш белән шөгыльләнүчеләр саны елдан-ел арта бара — бүгенгә аларның саны 30 мең чамасы.