Татарстан укучылары «Имин тәгәрмәч» Бөтенроссия конкурсында көмеш медаль яулады

Татарстан Республикасының яшь инспекторлары ЮИД «Имин тәгәрмәч» Бөтенроссия конкурсында көмеш призер булдылар. Бу хакта ТР Дәүләт автоинспекциясе хәбәр итә.

31 августтан 7 сентябрьгә кадәр Екатеринбургта бөтен Россиядән 10-12 яшьлек 356 катнашучыны җыйган масштаблы чара уза.

Кичә бүләкләү тантанасы булды. Конкурста беренче урынны Мәскәү командасы, ә бронзаны Калининград өлкәсе вәкилләре алды.

Татарстаннан конкурста Балтач районының Салавыч лицее укучылары Кәрим Галимҗанов, Алмаз Гарифуллин, Рәзилә Саттарова һәм Эллария Саттарова катнашты. Барлык сынаулар нәтиҗәләре буенча алар мактаулы икенче урынны алдылар.

Иртәгә, 7 сентябрьдә, 9:30 сәгатьтә «Казан» халыкара аэропортында яшь призерларны тантаналы каршылау планлаштырыла.

Фото: © Госавтоинспекция РТ

Чыганак: https://www.tatar-inform.ru