Илдар Юзеевның «Гашыйклар тавы» әсәре буенча төшереләчәк фильмга кастинг үтә

27нче июль көнне «Татаркино» оешмасы Илдар Юзеевның «Гашыйклар тавы» әсәре буенча төшереләчәк фильмга кастинг оештыра. Иҗат төркеме төрле яшьтәге актерлар эзли.

Илдар Юзеев «Гашыйклар тавы» әсәрен 1985-86 нчы елларда яза. Спектакль 2014 елның 30 ноябреннән Кәрим Тинчурин исемендәге Татар дәүләт драма һәм комедия театрында аншлаг белән уза.                                     

Кастингка 20-30 яшьлек егет-кызлар һәм 50, 60, 80 яшьлек өлкәннәр чакырыла. Барлык катнашучыларның татар телендә камил сөйләшүләре мөһим.

«Бу юлы Илдар Юзеев әсәренә тукталырга булдык. Кинотасма өчен сценарийны аның улы Салават Юзеев язды, фильмны да ул төшерәчәк. Әлегә төгәл локацияләрне әйтү кыен, шулай да Әтнә районын, Лениногорскны күзаллап торабыз. Бәлкем башка районнар булыр», - ди Ирек Хафизов.

Актерларны «Татаркино» учреждениесе директоры Миләүшә Айтуганова, Татарстанның атказанган артисты, фильмның кастинг-директоры Ирек Хафизов, Татарстан кинематографистлар берлеге әгъзасы, драматург, язучы Салават Юзеев сайлаячак.

Кастингта катнашырга теләүчеләрне Казан шәһәре, Петр Алексеев ур., 3 йорт адресы буенча көтәләр.

Кастинг 10:00 сәгатьтә башлана.  

Кастингка язылу өчен махсус төркем: https://chat.whatsapp.com/BeYkyvgOfEqDmzaYWGCNzG