Чаллының «Эврика» мәдәният үзәгендә Лилия Фәттахованың иҗат кичәсе үтте

Чаллының «Эврика»шәһәр мәдәният үзәгендә шагыйрә, язучы, С.Сөләйманова исемендәге кызыксындыру премиясе иясе, «Мәйдан» журналының баш мөхәррире Лилия Фәттахованың иҗатына багышланган кичә үтте.

Әдәби-музыкаль кичәгә журналистлар, шәһәребез артистлары, Чаллының автомеханика техникумыннан 2 курс студентлары һәм Лилия Рәфхәт кызының иҗатына битараф булмаган чаллылылар җыелган иде.

Лилия Фәттахова быел күркәм юбилеен - 50 яшьлеген бәйрәм итте. Аны каләмләшләре Айрат Суфиянов, Лилия Гыйбадуллина бәйрәм белән котлады.

Кичәне Зөләйха Минһаҗева алып барды, Флүрә Талипова, Равил Галиев җырлары белән бизәде. Бәйрәм Равил Галиев башкаруында «Юкка түгел» җыры белән тәмамланды.

Лилия Рәфхәт кызы Фәттахова «Көмеш кыңгырау» газетасы эшчәнлегенә үз өлешен керткән шәхес. Лилия ханым берничә ел газетаның баш мөхәррир урынбасары булып эшләде. Әле дә балалар әдәбиятын кызыклы хикәяләре һәм шигырьләре белән баетып тора. Форсаттан файдаланып, хезмәттәшебезне күптән түгел булып узган юбилее белән котлыйбыз. Аңа иҗат уңышлары, көтелмәгән шатлык-куанычлар, күңелле сәяхәтләр һәм ныклы саулык теләп калабыз.

Көннең кыскача яңалыклары безнең телеграм-каналда https://t.me/chelny_rt

Без Вконтактеда https://vk.com/komesh_kingiray