07.04.2017 10:32

Күрше кызы

Автор  Рәшит Бәшәр
Оценить
(0 голоса)

 

Күзем төште: ул бүген

Тагын да чибәрләнгән.

Яңгыр юган вак ташка

Су тамды чиләгеннән.

 

Матур кызга ияреп

Кайтып килә песи дә.

Өреп торган көчеккә

Китми аның исе дә.

 

Песие калмый кыздан

Барса да кая гына.

Әнә тагын мияулап

Сыенды аягына.

 

Исте дә шаян җилләр,

Тузгытты кыз толымын.

Кадакланып тик торам,

Адаштым барыр юлым.

 

Җемелди кояш кызның

Тамчылы алкасында.

Кулын сузды елмаеп

Чәчәкле капкасына.

 

Чишмәдән күлмәгенә

Күбәләк кунып кайткан.

Гөлле бакча. Бакчада

Сиреньнәр чәчәк аткан.

 

Сиреньнәр дә кыз сыман

Киенгәннәр ап-актан.

 

Капка ачык. Әнисе

Ишегалдына дәшә:

– Чәй эчәргә Рузилне

Өйгә чакыр, Миләүшә!

 

Инде Миләүшә белән

Мин дә атлыйм янәшә.

– Мияу! Мин уяу! – Песи

Әллә миннән көнләшә.

 

Миләүшәне күзәтеп

Яннан бераз бара да,

Килә дә керә аннан

Икебезнең арага.

 

Еще в этой категории: « Югалган бәбкәләр Сигезәү »

Добавить комментарий


Защитный код
Обновить