Редактор

Редактор

21.02.2018 15:55

Регионара иҗади бәйге игълан ителде

Игътибар!

Шагыйрь һәм прозаик Рафаил Газизов иҗатына багышланган регионара иҗади бәйге игълан ителде. Әлеге бәйгене Татарстан язучылар берлеге, Мамадыш районы башкарма комитеты, районның мәгариф, мәдәният идарәләре, Үзәк китапханәләр челтәре оештыра. Бәйге балаларда туган җиргә, туган телгә мәхәббәт тәрбияләү, иҗат белән кызыксыну уяту максаты белән оештырыла һәм үз алдына сәләтле балаларны ачыклау бурычын да куя.

Конкурста түбәндәге номинацияләр буенча нәтиҗәләр ясалачак:

шигырьләр (3тән дә ким булмаска тиеш);

проза әсәрләре (хикәя, очерк, эссе);

әкиятләр (халык авыз иҗатын кулланып);

драма әсәрләре.

Иҗат эшләре 1нче апрельгә кадәр кабул ителәчәк. 2нче апрельдән 10нчы апрельгә кадәр иң яхшы эшләр сайлап алыначак. Җиңүчеләрне бүләкләү тантанасы 13нче апрельгә билгеләнгән.

Конкурска яшь категорияләрен исәпкә алып нәтиҗә ясалачак. 1-4 сыйныфлар – кече яшьтәгеләр төркеме дип санала, 5-8 сыйныфлар – урта төркем, 9-11 сыйныфлар – өлкән төркем.

Бәйгегә дәрәҗәле жюри нәтиҗә ясаячак, һәр номинациядә 1, 2, 3 урыннар һәм гран-при билгеләнәчәк. Мөрәҗәгать итү өчен телефон номеры: 8 (85563)32650.

 

21.02.2018 08:22

Мария Сотскова - беренче унлыкка шанс бар

Кызларыбызның кыска программада чыгышы тәмам. Кызларыбыз дөньякүләм рекордлар белән беренче-икенче урыннарда әлегә. Соңгы булыпчыгыш ясаучы тагын бер талантлы спортчыбыз Мария Сотскова, ялгышлык җибәреп, бераз арттарак. Мариянең дә беренче унлыкка керергә мөмкинлеге бар. Ярышның дәвамын көтеп калабыз.    

21.02.2018 08:12

Алинә Заһитова - лидер! 82,92!!!

Алинәбез "Кара аккош" кыска программасы белән 82, 92 баллга чыгыш ясады! Әлегә беренчелектә бара. 

21.02.2018 07:58

Евгения Медведева - 81,61!!!

Бу минутларда Олимпия уеннарында кызларыбызның чыгышы бара. Кыска программа. Алинә Заһитова, Евгения Медведева һәм Мария Сотскова! Җан атабыз! Евгения – 81,61 балл!!!

20.02.2018 19:30

КӨТӘБЕЗ! ЫШАНАБЫЗ!!!

Олимпия уеннары дәвам итә. Иртәгә Мәскәү вакыты белән иртәнге 04:00 сәгатьтә фигуралы шуу буенча хатын-кызлар арасында ярышның кыска программасы башлана. Әлеге спорт төрендә Рәсәйдән өч кыз: Евгения Медведева, Мария Сотскова һәм милләттәшебез Алинә Заһитова катнашачак. Кызларга уңышлар телибез!

Яуланган медальләр саны буенча Рәсәй командасы (дөресрәге, Рәсәйдән килгән атлетлар командасы) әлегә нибары 20 урында. Безнең спортчылар исәбендә 3 көмеш һәм 8 бронза медаль бар. Беренче өчлектә Норвегия, Германия һәм Канада.     

20.02.2018 11:05

«Идегәй»дән истәлек

 

И Идел-йорт, Идел-йорт,

Идел эче имин йорт,

Атам кияү булган йорт –

Иелеп тәзем кылган йорт;

Анам килен булган йорт –

Иелеп сәлам әйткән йорт;

Кендегемне кискән йорт,

Керем-коңым юган йорт;

Бия сауган сөтле йорт,

Кымыз эчкән котлы йорт;

Идел – Җаек арасы

Елкы белән тулган йорт,

Казан – Болгар арасы

Кала белән тулган йорт;

Ашлы белән Ибраһим

Ашлык белән тулган йорт,

Ата-бабам тоткан йорт,

Котлы булсын туган йорт!

                                                 («Идегәй» татар халык дастаныннан өзек) 

«Идегәй» - татар халкының тарихи героик-эпик шигъри дастаны. Ул Туктамыш хан һәм Идегәй әмир турында язылган күпсанлы риваять һәм легендалардан гыйбарәт. 17-18 йөзләрдә тулысынча формалашып бетә. «Идегәй»нең алтай, башкорт, казакъ, каракалпак, Кырым татарлары, нугай, төркмән, үзбәк милли версияләре дә мәгълүм.

“Идегәй” дастанындагы вакыйгалар XIV гасыр азагы-XV гасыр башында Алтын Урда дәүләтендә тәхет тирәсендә барган канлы көрәшнең дәүләтне таркатуга китергән кискен бер чорын сурәтли. Әсәрнең каһарманнары – Туктамыш хан, Аксак Тимер, Идегәй әмир һәм башкалар – үз заманының күренекле шәхесләре.

20.02.2018 09:54

«Җир сәгате»нә кушылабыз!

Татарстан халыкара «Җир сәгате»  акциясенә кушыла. ТР Экология һәм табигый байлыклар министрлыгы хәбәр итүенчә, әлеге чара 24 март көнне кичке 20.30 – 21.30 сәгатьтә үтәчәк. Шушы вакыт аралыгында республиканың барлык районнарында биналарны, корылмаларны, торак йортларны яктырту туктатылып торачак. Әлеге акциягә кушылырга теләүчеләр бу вакытта фатирларында, өйләрендә ут сүндереп тора ала.

19.02.2018 13:38

Яңа бәйгеләр

Дустым, «Көмеш кыңгырау» яңа бәйгеләр игълан итә. Бүгеннән «Иң яхшы шигырь», «Иң яхшы әкият» бәйгеләре старт алды. Шигырьләр һәм әкиятләреңне безнең электрон адреска юлла: Этот e-mail адрес защищен от спам-ботов, для его просмотра у Вас должен быть включен Javascript . «Бәйгегә» дип язып куярга да онытма. Иң яхшы дип табылган иҗат эшләре газета битләрендә урын алачак һәм «Көмеш кыңгырау» дипломнарына лаек булачак.

«Яраттыра беләләр» фото-бәйгесе дә игълан итәбез. Яраткан йорт хайваның белән фотога төш тә майлга җибәр( Этот e-mail адрес защищен от спам-ботов, для его просмотра у Вас должен быть включен Javascript ).

Нәтиҗәләр сентябрь аенда билгеле булачак.

 

19.02.2018 10:32

ҺАВА ТОРЫШЫ НАЧАРЛАНА

Татарстанда һава торышы начарлана. Фаразларга караганда, бу атна карлы, җил-буранлы булачак. Ял көннәрендә суыклар көтелә. Һава температурасы -25 градуска кадәр төшәчәк, дип кисәтә белгечләр. Күрәсең, Ватанны саклаучылар бәйрәмендә табигать тә кырыс, ныклы холкын күрсәтеп алмакчы. Хәерлегә булсын! Калынрак киенегез, юлларда исән-имин йөрегез, берүк!

19.02.2018 09:12

Ә бездә яңалык!

Күрдегезме әле? Укыдыгызмы әле??? "Көмеш кыңгырау"ның яңа саны дөнья күрде! Газета чыгару серләре, Олимпиада көндәлеге, Муса Җәлилгә багышланган шигъри бәйләм, балалар бакчалары тормышыннан кызыклы яңалыклар... Гадәттәгечә, иң кызыгы - бары тик сезнең өчен!!! Күрми калмагыз!
<< Первая < Предыдущая 1 2 3 4 5 6 7 8 9 10 Следующая > Последняя >>
Страница 1 из 111